لا تحزن

هي أحداث سردية لقصة يوم واحد من أيام الحياة تقع أحداثها بين الساعة الخامسة فجراً والثانية عشر ليلاً ، تروي قصة واقع يوم كامل  في حياتي .

 =================

على الساعة خمس فجر الخميس  وبعد ما صاح الديك وردد كوووووو كوووووع عووووع وقبل ما يأذن تعيب ويقول الله أكبر ، إلا صوت أبوي يصرخ عليّ قوم صلي.

طشيت من فراشي وانا أتشاحط وأتثاوب  ورحت أخبش والماي بارد ينّزق ، توضيت ورحت المسجد صليت ورديت أرقد ، غير أني ما واحيت  أحط راسي فوق الوسادة  غير صوت  أبوي ينهمني " قوم تقهوى باغيين اليوم نروح الضاحية نرضم جلبه عشان نزرع فيها فجل حال الرمضان ونشرط الزور والكرب  ونحش حال الهوش ".

قمت اعرك عيوني وخبشت خشمي مرة ثانية ، وانا أشم الوالدة  ربي يحفظها مسويه لنا فوق الطوبج  قروص  وتارسه بهن ديسي مخلوطات بعسل  ، كلينا منهن  مع سح نغال  وتقهوينا  فوقهن وشربنا كوب اللبن بو محلوب  الفجر من بقرتنا بو طالعه ضامرتها وتوكلنا  على الخالق .

رحنا الضاحية  ، أنا ادف العربانه  وفيها الشيول والمسحاة  خاطف  قدام  وأبوي وراي شال على كتفه  حبل الطلوع  والمجز بيّدْه ، وأخوي العود سالوم ورانا شال ملة القروص ومدلاة القهوة .

الساعة ست وربع  وصلنا الضاحية سمينا الرحمن وقمنا نشتغل ، أخوي يشرط النخل وأبوي يرضم وانا أشل الكرب والخوص أعقهن فالوادي وأحرقهن ، الساعة تسع  ونص مر علينا هديب راكب حماره وشال طلعة نبات رايح الجلبة ماله ينبت  كمين قب بو مطلعتنهن  النغال  والمنحي ، وراه  خطف  شامس شال شيول ورايح يرد الفلج اليوم عليه الدور عشان يسقي  ضاحيته  ، وبعدهم  خطفت  حبوه جوخه هيه وبنتها  شيخوه  رايحات يتاملن  نصروه زوجه  مبروك راعي الدكان  ويتشكرن لها بالسلامة  مربيه وجايبه  ولد سموه مبارك .

أذن علينا الظهر الساعة 12 وربع ، خلصنا  نحوَّتنَا لليوم وقمنا شلينا قشارنا وردينا البيت ، وعلى الدرب لاقينا سرحان جايب تريب حطب على البيكاب الحمرا بو حاله ، وعبيد ولد معيوف جالس ينكل تريب طابوق قدام بيت الصم باغي يسوي صفّه غيرها فوق السطح مال بيته عشان يعرس فيها ولده سعيدان ، وقبل ما نوصل بيتنا قابلتنا ريحة مرقة العوال بو مسوتنها الوالدة حال الغدى ويا ربي محلاها نستنا التعب  كله والغبرة والعفرة  اللي كاسيه خشومنا وعيونا منقعرة منها ، صلينا الظهر وتغدينا الساعة وحده .

بعد الظهر وعند العصريه ود عمي خمّاس وأخوه مرّآن  أسمعه يناعق ويصرخ عليّ هينك يوه جعروف  خلا قوم ، الشباب ينتظرونا  فالعابية  ، جيب معك  التوفه والبمب ، قمت أدور  هين كوشي قارعنه  والزلغان ، وبسرعة طلعت حتى صديريتي بو حال  الرياضة لبستها فالدرب من كثر ما خمّاس جالس ينهمني ويصارخ مقوم صغيرين الحلة من رقادهم .

وصلنا العابية وحصلنا الربع كلهم جالسين يحرصونا ، قال مسعود هينها التوفه جعروف جيبها والبمب نترسها باغيين نتدرب قبل ما نلعب بو تارسات عيونكم رقاد.

بعد ما خلصنا لعب  وأذن المغرب الله أكبر صليت ورحت صوب   بيت عمي أشوف عمّوره بنت عمي  والعاذرة  عوين  مطرشتني أمي أجيب  الطوبج من عند مخلّفة عمي  بو شالتنه  من عندنا  الظهر عشان تسوي عليه شوب وثوم .

دخلت البيت وجلست ابرق بعيوني يمين وشمال هينها عمّوره منقرعه ، لين شفتها  جالسه فوق  النقصه  على السطح  وجالسه تقرأ قصة الشاطر حسن وست الحسن والجمال ، بو يشوفها يقول من زود ذاك الجمال بو طاغي عليها ما كنها والطوبج واحد ، بس الفواد مو أسويبه يوم هوه عميان وما شايف غيرها  وحاجز لها مكان ، زعقت عليها عمّوره هينها أمش ، قالت لي أندوك أنته نوبه ذا البغآم  عن موه يسأل ..!!، وقبل ما أقولها عن بو ففوادي خرج الكروب خمّاس من الدهريز وخلى الفملي بو جالس يلعبها يوم سمع  صوتي وقال جعروف  لا تنسى تجيب مدلاة الشاهي  بالنعناع  خلاَف معك  وتعال  نرمس فوق الدك  والأونو والصراج ، تراه بو حالنا طيحه مرّآن من فوق الدريشه وكسره .

قلت له أنزين  يالدمير  وأنت لا تنسى تجيب معك دبة ماي وكوبات الشاهي ولا تنسى الحصير يا الدمير.

أندوك انته نوبه يقول خمّاس حالي عوين ما عجبه الكلام يوم قلت له الدمير ، ما يعرف انه دمير وحاسد ما خلاني  أشوف عمّوره وأكحل عيوني فيها وانا اللي متعني حالها عشان أشوفها .

رجعت البيت وتقهويت مع أبوي سح نغال وشويه فواله  ، وجلسنا شوي نتسامر لين أذن العشى ورحنا المسجد نصلي وردينا البيت وحرصت أمِينا علين تغرف لنا  العشى كانت مسويه مرقة دجاج وخبز عماني لحسنا صوابعنا وراه وحمدنا الله على هالنعمة  وشكرناه .

بعدها أبوي راح يرقد واخوي العود نوبه والوالدة  بعد الله يحفظها غسلت الوعيان وراحت ترقد ، وما بقى غيري أنا ، لبست دشداشتي وشليت مدلاة الشاهي والأونو  ورحت الدك حصلت خمّاس ومرّآن فارشين السمّة تحت الغافة بدل الحصير ، خبرني خمّاس ان امه قشبته عشان الحصير وما خلته يجيبه عوين ما باقي عندهم غيره وبآية تفرشه فالحوش  وجالسين يحرصوني  من ساعه ،  جلسنا نلعب اونو ونتسامر وبين الضحكة واللعب كوب الشاهي يدور  بينا وجلسنا لين قربت الساعة 11 ونص ورحنا كل واحد بيته عشان نرقد ونرتاح شوي بعد تعب يوم من الفجر لين المغرب ونستعد ليوم آخر من أيام عمرنا من الفجر لين العتيم  .

..،( أنتهت )،..

=====

كلمات في سياق النص

-          الغافة : شجرة  تنبت في المناطق الصحراوية  وتعتبر دليل على وجود الماء في المكان اللي تنبت فيه .

-          السمّه : بساط يوضع على الأرض مصنوع من سعف النخيل .

-          قشبته : نازعته – صارخت عليه.

-          أتشاحط : أتمدد.

-          ينهمني : يناديني .

-          الضاحية : المزرعة.

-          نرضم : نحرث.

-          جلبة : قطعة صغيره من الأرض يتم تمهيدها وحرثها لزراعتها بنوع معين من الخضروات أو الفواكه او الأعلاف.. الخ.

-          نشرط : نقلم الأغصان الميتة واليابسة في النخلة والأشجار .

-          الزور والكرب : أغصان النخلة .

-          الطوبج : حديدة دائرية الشكل يتم عليها خبز الخبز العماني .

-          ديسي : وعاء يوضع فيه الخبز أو القروص .

-          مله : وعاء يستخدم لحفظ الأطعمة فيه .

-          شيول ومسحاه : أدوات تستخدم لحرث الأرض.

-          المجز : أداة حديدية مسننه تشبه السكين تستخدم للقطع .

-          العابية : الأرض الجافة ( السبخة ).

-          الكوش : الحذاء.

-          التوفه: كرة القدم.

-          البمب : أداة لتعبئة الكرة بالهواء.

-          مخلفة عمي : أرملة عمي .

-          النقصه : جزء صغير في جدار البيت يكون بشكل منفرد .

-          الدهريز : فناء داخل المنزل يكون حلقة وصل بين غرف المنزل  ويستعمل لجلوس العائلة فيه ( الصالة ) .

-          المدلاه : دلة القهوة او الشاي .

-          الدك : تلة صغيرة مرتفعة قليلاً عن سطح الأرض.

-          الصراج : القنديل.

-          من ساعه : من وقت – منذ زمن – من بدري .

-          طلعة نبات : حبوب الطلع اللي تستخدم لتنبيت ثمار النخيل .

-          الجلبة : قطعة ارض صغيره نسبياً فيها بعض الأشجار.

-       النغال والمنحي : صنفين من أصناف النخيل  ، تعتبران من أوائل النخيل في الأثمار والقطاف ، تتواجد في أغلب مناطق السلطنة ان لم تكن جميعها .

-          يتاملن : يزورن .

-          خطف : مر

-          قب : ثمار النخيل في مرحلة الطلع.

-          زعقت : ناديت

-          نحوَّتنَا : فترة زمنية .

-          تريب : شحنه .

-          صفّه : غرفة .

=====

أسماء شخصيات في سياق النص

( هديب – تعيب – شامس – الصم – سعيدان - سرحان – عبيد ولد معيوف – جوخه – شيخوه – نصروه – مبروك – خمّاس – مرّآن – جعروف – سالوم – عمّوره – مسعود )